Foto zVg

Traumhaft

Wenns am eerschte lääjen Ooben im Früelig nachem erschte Heugras, wo me gmääit het, schmeckt, packt mii Johr für Johr en unbeschryybligi Seeligkeit. I wett denn am liebschte numme no im Garte schaffe. 
Hütt chniemp i ufem Bord under der grosse Hagebuechen umme, wo vill wildi Pflanze sich dörfe vertue. I hau d Soomeständ vo den Akelejen ab. De winterheerte Fuchsie, wo schüüch und bleichsüchtig zum grüene Gwiir am Hübeli uusluege, mach i Luft, ass si no z Gnade chömme in däm Filz vom Steisoomen und vom Ääfeu, wo se will überwuechere. E Hampfle Komposcht git ene denn die nötigi Chraft zum Blüeje, wenn d Zyt derfür noochen isch. 
Und das goht bygoscht schnäller as me dänkt! Eerscht no hai do Wyybärgtülpli ihri goldige Chrönli gspienzlet. Vorem Zmidag het me sich chönne mit Ramselebletter bediene und spööter es Büscheli Waldmeischter für e Maitrank chönne günne. Und jetz sy die milchigwysse Täller vom Holderbluescht scho am Verblüeje! 
D Baumtropfe, wo sich ufem Hübeli breit gmacht hai, legg i in es Chörbli. En Absud dervo git e tiefgrüens Bad ab für d Füess oder für d Händ. S Lisa im Aargau het dääwäg d Schmärzen in ihrem giechtige Zeeche chönne lindere. Wo s glyych Chrut no jung und zart gsii isch, hets druus e heerligi Suppe gee. E Traum vomene Süppli! Und die fyligranfyyne Dolde vom Gyyrsch, wie die zimmlig verhassti Pflanzen au heisst, machen us jedem Rosemaijeli e Traumstruuss! 
Alles, wo bsunders schön isch, wird jo jetz afe mitem Wort Traum verkupplet. E Maa mit eme Traumjob suecht imene Hüürotsinserat sy Traumfrau. Die chönnt ihn denn mit däm Traumjoghurt verwöhne, woni geschter drüber gläse ha. 
In jedem Heftli, au in deene mit Choch­rezäpt, liis i hüür nüt as vo Traumhaftem. Vo de Reiseproschpäkt nit z rede! Traum­ferie amene Traumstrand ufere Trauminsle cha me bueche. 
Es Fitness-Studio will eim vorhär no zunere Traumfigur verhälfe, für ass men e rächti Gattig macht im Badchleid. 
Fascht an jedem Traumzyyl, wo me chönnt aane goh, wai si eim e Willkommenstrunk offeriere. Die paar Schlück Blööterliwasser, Saft oder Güüggs sy fascht jeder Reiseagentur en Äxtra-Zyylen in den Inserat wärt. Allwäg überleit sich denn e Mängen und e Mängi, ass me do unbedingt sett ­zuesäge bi sovill gaschtgäberischer Grosszügigkeit! 
E «Gratis-Willkommenstrunk an Bord!» hets au gee, wo mer einisch die traumhaft schöni Schifffahrt vo St. Petersburg uf Moskau aadrätte hai. Ufem Wäg zum Schiff het is die zaggigi Hostess verzellt, wie guet ass d Passagier bi ihnen uufghobe syyge. «Fünfmal pro Tag werden Sie gefüttert», het si eus aagchündiget. Und füre Fall, ass öpper sett es Problem oder Sorge haa, dörf me sich unschiniert an sii wände. «Wir werden dann gerne helfen, Sie zu entsorgen», het si versproche. Über das aabe hai mer der Wodka, won is gspändiert worden isch, scho möge verlyyde! 

Mit eme Gruess übere Gartehaag yyne holt mi e Frau, wo s Etterwägli duruuf lauft, vom Schiff uf der Neva zrugg in euse romantische Garte, wo vo traumhaft schönem Summerwätter träumt.

 

Text: Vreni Weber-Thommen, Fotos: zVg