Illustration: Domo Löw

Bärlauch

Was tun, wenn die dörfliche Idylle von einer Hexe gestört wird? Wenn plötzlich der Bach in die falsche Richtung fliesst und die Hühner in den Süden fliegen? Das Dorf Bärlauch weiss sich zu helfen und greift auf die schöne alte Tradition der Hexenverbrennung zurück. Nur – die Hexe müsste auch mitmachen. Und das erweist sich als echte Herausforderung.

Töff

Z’Bärlauch het e Häx gläbt. Das het aber no niemer gwüsst. Us cho isch es erscht, wo nere ein Bänzin klaut het us dämm Kanischter, wo sie immer isch go fülle a d’ Tankstell. Z’Fuess.

No isch nämlech dämm si Töffli statt dr Hübel durab grad i d’Luft use witer gfahre und erscht wider oben ab echo, wo s’Bänzin fertig gsi isch.

Dr Gmeinirot isch denn zämme cho wägem Verbrenne vo dere Häx. Me het sich aber nit chönne einige, will die einti Helfti d’Idee gha het, me chönnt se jo für’s «Wetten dass …» aamälde mit ere Live-Übertragig us em Dorf. Die angeri Helfti het gfunge, es gech um s’Prinzip.

Also item: Me het denn e Kompromiss gfunge. Zwar si die mit em «Wetten dass …» duure cho. Aber me het ere immerhin e saftigi Buess gschickt, will sich usegschtellt het, dass sie gar kei Füehrerschiin gha het.

Hüehner

Z’Bärlauch het e Häx gläbt. Deren ihri Hüehner si im Herbscht i Süde gfloge.

Dr Gmeinirot het e Gmeinsversammlig iiberuefe mit de Hüehner als einzigem Traktandum. Es hei sich sofort zwöi Parteie bildet, wo sich überhaupt nit einig gsi si. Die einti het gseit, Hüehner i Süde lo z’fliege, sig nit artgerächt und wäge däm müess me d’Häx verbrenne. Die angeri het gseit, Hüehner i Süde lo z’fliege, leischti dr internationale Verbreitig vo dr Vogelgrippe fahrlässig Vorschueb und wäge DÄM müess me d’Häx verbrenne.

Me het sich schliesslich druf geinigt, d’Be­gründig allgemein z’formuliere und het die Verbrennig i d’ Wäg gleitet.

Beidi Parteie si zahlriich verträte gsi. Aber grad, wo me dr Schiterhufe het welle aazünge, het sich dr Himmel verdunklet, es het gruscht und alli angere Hüehner vo Bärlauch si au Richtig Süde gfloge. Die beide Parteie si sofort ufenang los gange und hei sich gegesitig welle uf e Schiterhufe schüpfe.

Also item: Nach ere halbstündige Schlegerei si alli zfride gsi und me hät dr Schiter­hufe chöne aazünge. Nume: Jetz isch d’Häx verschwunde gsi. E paar ganz Iifrigi hei se welle go sueche. Aber dr Amme het abgwunke und gseit, me müess au emol en Aug zuedrucke.

Fasnacht

Z’Bärlauch het e Häx gläbt. Die isch a dr Fasnacht als Häx gange. Das het aber e Problem gäh a dr Kasse zum Maskeball. Döt het me se natürlech nit chönne ine loh, will numme Kostümierti zuegloh gsi si. S’Häner Friedi het ere welle ihre Mantel uslehne zum sich als Zivilischtin z’verchleide. Aber für Zivilischte hät’s denn bi dr Kostüm-Premierig wieder kei Kategorie gha. Zum Glück het ere denn öpper e Micky-Maus-Set usglehnt und mit dämm het sie chönne ine.

Chum isch sie din gsi, het’s d’Sicherige putzt und es isch dunkel worde. Wo s’Liecht wieder aa gange isch, isch d’Aalag vo de Bärlauch-Swingers abgläge. Und wo denn no ne Kaffimaschine explodiert isch, het d’Jury beschlosse, d’Häx sicherheitshalber z’prämiere.

Dasch aber gar nit eso eifach gsi, will s’halbe Dorf als Micky-Maus cho isch. D’Jury isch zwar unuffellig usgschwärmt und het au Späherinne is Dame-WC gschickt, het aber nit definitiv usegfunge, wele Micky-Maus as d’Häx gsi isch.

S’isch immer spöter worde, me het d’Prämierig mehrfach usegschobe und immer meh Lüt si unger de Tische gläge.

Also item: Schliesslech het me zum erschte Moll i dr Gschicht vom Bärlaucher Maskeball nit e Einzelperson uszeichnet, sondern alli Micky-Mäus zämme – für die originelli Gruppe-Idee.


Texte: Franziska Maria von Arb, Foto: Hanna Schiess, Illustration: Domo Löw